الزتونة في استهداف أصحاب الأعمال على فيسبوك

مؤخرا، البحث عن بعض الاهتمامات والسلوكيات والديموجرافيكس صعب ومبقاش يظهر مباشرة خاصة لو حابب تستهدف بعض الوظائف زي الدكاترة مثلا أو المحامين أو المهندسين وغيرهم، بيظهرلك "اهتمامات" لكن مش "ديموجرافيك"، وطبعا الفرق بينهم كبير لأن الاهتمامات بيبقى شخص مهتم بشيء معين لكن مش شرط يكون بيشتغل الوظيفة دي، يعني لو حابب تستهدف طبيب أسنان مثلا وبحثت عن كلمة "Dentist" هيظهرلك اهتمامات كتير لكن مفيش منهم حاجة Job Title أو حتى Field of study فبالتالي إعلانك ممكن ميوصلش لأطباء أسنان أصلا !

طيب إيه الحل ؟

الحل إنك لازم تمسك كلمة واحدة على الأقل متعلقة بالوظيفة اللي بتبحث عنها، بعد كده الموضوع سهل، هتضغط على الاقتراحات هيظهرلك وظائف كتير جدا متعلقة بنفس المجال أو قريب منه تقدر تختار منهم اللي انت عايزه.

وفي البوست ده هحاول أجمعلك كلمات مفتاحية لأهم المجالات اللي ممكن تحتاج تستهدف أصحابها (هتنسخ الجملة على بعضها وتبحث عنها في خانة اختيار الاهتمامات):

الأطباء:

Clinical Psychologist

ملحوظة: لازم تستعين بترجمة جوجل علشان لو حبيت توصل لتخصص معين تبقى عارف اسمه وتختاره من قائمة الاقتراحات.

الصيادلة:

Pharmacist Assistant

المهندسين:

Civil Engineering Manager

المحامين:

Civil Lawyer

أصحاب ومديرين الشركات:

Owner/Manager/CEO

أصحاب المطاعم:

Restaurant Owner

ميكب أرتيست:

Esthetician, Makeup Artist

ضباط الشرطة:

Police Patrol Officer

مطوري العقارات:

Owner/Property Manager

المدرسين:

High School Teacher

ملحوظة: 

الاستهداف من خلال الوظائف بيكون عن طريق إن الشخص بيكون كاتب وظيفته على فيسبوك، وطبعا مش كل الناس بتعمل كده، فبالتالي ممكن تضيع على نفسك جمهور كتير مهتم أو الإعلان نفسه ممكن يكون أداؤه مش أحسن حاجة خاصة لو بتستهدف تخصصات معينة مش ناس كتير بتشتغل فيها. 

فالحل إنك ممكن توسع الاستهداف شوية من خلال استهداف بعض "الاهتمامات" مش "الديموجرافيكس" اللي بتعتمد على اهتمامات للجمهور ده تحديدا.

يعني مثلا لو بتبيع كورس وعايز تستهدف الناس اللي شغالة في مجال "تصميمات الجرافيك" فأكيد هيكونوا مهتمين ببعض برامج التصميم زي Adobe Photoshop, أو بعض المواقع زي 99designs, Behance. 

أو لو عايز تستهدف الناس اللي شغالة في مجال التسويق الإلكتروني هتلاقيهم مهتمين بمواقع زي HubSpot, Moz (marketing software), Shopify, Social Media Examiner, WooCommerce .. وهكذا