ازاي إعلانات فيسبوك بتشتغل؟ وليه التكلفة عالية؟ (فيديو)
ازاي إعلانات فيسبوك بتشتغل ..
وليه إعلاني تكلفة التفاعل أو الرسالة عالية والـ Reach ضعيف ؟
الجواب السريع:
إعلانات فيسبوك بتشتغل بنظام المزاد Auction ، زي المزاد اللي كلنا عارفينه اللي هو كذا شخص بيشتروا حاجة معينة وكل واحد بيحط عرض سعر والأعلى سعر فيهم هو اللي يكسب المزاد.
وبالتالي هنعتبر إن المكان اللي بيظهر فيه الإعلان على فيسبوك ده خدمة هنشتريها ، وهنفترض إن في 2 منافسين مستهدفين شخص بمواصفات معينة وكل واحد فيهم عايز إعلانه هو اللي يظهر للشخص ده على فيسبوك ، فكل واحد من الاتنين معلنين دول هيحط عرض سعر Bid واللي هيحط فيهم السعر الأعلى هو اللي إعلانه هيظهر قبل التاني.
ولو عايز تعرف أكتر عن عروض الأسعار على فيسبوك شوف البوست ده:
الجواب المفصل:
المزاد مش بيقتصر على مجرد عرض السعر Bid بس ، في عاملين تانيين أهم من عامل عرض السعر بيأثروا على نتيجة المزاد ده:
1. معدلات الإجراءات المقدرة Estimated Action Rates:
ده معناه إن فيسبوك بيعمل توقع تقديري لكل شخص من الجمهور اللي الإعلان موجه ليه ، بيشوف أنهي إعلان من إعلانات المعلنين دول هيجذب العميل أكتر وهيخليه يتفاعل معاه أو يعمل تحويل conversion وبالتالي الإعلان اللي فيسبوك بيلاقي فرصته أكبر إنه يجذب التفاعل بياخد نقطة ترفع من فرصته في الفوز بالمزاد.
ملحوظة: محاولة إخفاء معلومات في الإعلان وتقديم معلومات ناقصة أو مضللة بغرض زيادة التفاعل بيأثر على الإعلان بالسلب على عكس ما ناس كتير بتعتقد ، وده ما يسمى بالـ Clickbait.
2. جودة الإعلان Ad Quality:
ده مقياس لمدى جودة إعلانك بناء على معايير كتير جدا منها على سبيل المثال:
رد فعل جمهورك وتقييمهم للإعلان من خلال اهتمامهم بيه أو عمل إخفاء للإعلان أو عمل بلاغ report للإعلان.
حجم النصوص في الإعلان فلو أكتر من 20% من إجمالي مساحة الصورة أو thumbnail الفيديو كده جودة إعلانك بتنخفض.
عدم إخفاء معلومات مهمة في الإعلان علشان تجبر الجمهور إنه يزور موقعك.
عدم استخدام لغة مثيرة وتهويلية أو مبالغ فيها في الإعلان.
وحاجات تانية كتير هنشرحهم في بوست مستقل بالتفصيل.
الاتنين دول مع بعض (معدلات الإجراءات المقدرة وجودة الإعلان) بيقيسوا حاجة اسمها "صلة أو ملائمة الإعلان" أو "Ad Relevance" ، واللي كلما زاد كلما زادت فرصتك في الفوز بالمزاد وزيادة ظهور إعلانك وتقليل التكلفة عليك في نفس الوقت.
وده بينقسم لـ 3 أدوات:
1. تصنيف الجودة أو Quality Ranking:
ده بيقيس مدى جودة إعلانك بناء على معايير كتير زي اللي ذكرناها في العامل رقم 2 "جودة الإعلان Ad Quality" وهنخصص لها بوست مستقل لأهميتها.
2. تصنيف معدل التفاعل أو Engagement Rate Ranking:
وده بيقيس معدل التفاعل المتوقع على إعلانك مقارنة بباقي المنافسين ، اللي هو احتمالية قيام شخص من جمهورك المستهدف بالتفاعل مع إعلانك ، زي ما ذكرنا في العامل رقم 1 من العوامل اللي بتأثر على نتيجة المزاد "معدلات الإجراءات المقدرة Estimated action rates".
3. تصنيف معدل التحويل أو Conversion Rate Ranking:
وده زي اللي قبله بس بدل ما يقيس معدل التفاعل المتوقع بيقيس معدل التحويل المتوقع أو conversion اللي هو الشخص أخذ رد فعل مع إعلانك انتهى بإنه سجل في موقعك مثلا أو اشترى المنتج بتاعك أو زار الصفحة بتاعتك إلى آخره.
كل واحد من الـ 3 أدوات دول بيديك 5 تصنيفات (فوق المتوسط - متوسط - أقل من المتوسط بنسبة 35% - أقل من المتوسط بنسبة 20% - أقل من المتوسط بنسبة 10%) طول ما إعلانك فوق متوسط أو متوسط كده انت تمام ، لكن لو أقل من المتوسط كده عندك مشكلة.
وده جدول بيوضحلك تعمل إيه لو لقيت أي أداة من الـ 3 أدوات دول تصنيف إعلانك فيهم أقل من المتوسط:
باختصار:
لو بتعاني من ارتفاع تكلفة سعر الرسالة أو التفاعل وقلة معدل الوصول أو Reach يبقى عندك مشكلة في محتوى إعلانك.
اهتم بجودة الإعلان من حيث كتابة بوست جذاب وفيه معلومات تفصيلية عن منتجك أو خدمتك ، وتجنب أي محاولة لخداع العميل أو تضليله أو إعطائه تجربة سلبية ، واختر صورة أو فيديو عالية الجودة وبدون كلام كتير عليها ، واهتم بجودة موقعك وسهولة تصفحه والوصول إلى المعلومات فيه ، واختار جمهورك بشكل صحيح علشان توصل للأشخاص المهتمين فقط ، وهتلاقي تحسن في نتيجة حملتك وبالتالي هتقل التكلفة عليك ويزيد التفاعل أو معدل التحويل conversions.
المرجع:
0 تعليقات