السؤال:

مشاكل غلق وتقييد الحسابات الاعلانية كتير الفترة دية ..

ممكن نصايح يابشمهندس محمد ازاي نحافظ علي الحساب ونتجنب الغلق والتقييد .

------------------------------

الجواب:

* لو الحساب جديد متعملش حملات كتير ابدأ بحملة او اتنين لفترة وبعدين زود بالتدريج.

* نفس الكلام متعملش حملات بمبالغ كبيرة مرة واحدة ابدأ بمبالغ صغيرة وزودها بالتدريج.

* حاول دايما الفيزا يكون فيها فلوس بحيث لما فيسبوك يسحب يلاقي رصيد بشكل مستمر، متخليش أي عملية دفع تترفض قدر الإمكان، وبرده لازم تشتغل بفيزا مشتريات (كريديت كارد) مش مسبقة الدفع، أيوة في أحيانا بعض أنواع الفيز المدفوعة مقدما بتشتغل ولكن وارد تترفض في أي وقت زي ما كانت فيزا فودافون كاش شغالة فترة وبعدين مبقيتش بتشتغل. برده الفيزا لازم تكون باسمك ويكون الاسم مطابق لاسمك في الحساب الإعلاني وبروفايل فيسبوك الشخصي، متشتغلش بفيزا شخص تاني. كمان متشتغلش بفيزا صادرة من دولة تانية، لازم تكون صادرة من نفس البلد اللي بتفتح منها الحساب الإعلاني.

* لو بتسافر برة مصر متفتحش حسابك من دولة تانية ومتخليش حد من دولة تانية برده يدخل على حسابك، ومتفتحش الحساب من برامج الـ VPN.

* فعّل المصادقة الثنائية في بروفايل فيسبوك الشخصي وفي مدير الأعمال (شرحته في الفيديو رقم 50 بالكورس).

* تجنب أي مخالفة للسياسات الاعلانية وأهمها:

- الاعلان عن أي منتجات محظورة أو المنتجات المقلدة لبراندات معروفة خاصة الملابس والأحذية والبرفانات والساعات.

- صور فيها (قبل وبعد) زي عمليات التخسيس مثلا أو التجميل أو علاج الأسنان وما شابه.

- أي محتوى فيه تمييز عرقي أو عنصري أو تنمر على شكل أو وزن أو سن أو نوع أو لون شخص زي كريمات تفتيح البشرة مثلا متحطش صورة فيها بشرة سمرا وجنبها صورة بشرة بيضا أو صورة فيها شخص عنده كرش وتعبيرات وشه حزينة ونفس الوضع بالنسبة للمحتوى المكتوب ميكونش فيه أي تلميحات لحاجات زي كده.

- خلي محتوى اعلانك صادق وغير مبالغ فيه ومتقدمش للعميل توقعات خيالية زي مثلا (اشتري المنتج ده وهتخس 20 كيلو خلال شهر !) وتجنب أي محتوى فيه احتيال زي مثلا (استثمر معانا وهتكسب عائد شهري 20%) وما شابه.

- لو هتعمل إعلان وفيه لينك لموقع خارجي لازم الموقع ميكونش فيه مخالفات زي برامج ضارة أو نوافذ منبثقة مزعجة أو فورم تسجيل بيانات الزائر اللي لازم يسجله علشان يشوف محتوى الموقع أو أي تجربة سلبية للمستخدم.

وبشكل عام تجنب أي مخالفة للسياسات الإعلانية وفي فيديوهين كاملين بآخر الكورس شرحت فيهم كل السياسات الإعلانية لفيسبوك لازم تشوفه.